చలో ధూం దాం

చలో ధూం దాం...

చలో ధూం...దాం
చలో ధూం దాం&చలో ధూం&దాం
చలో ధూం దాం తెలంగాణ జాతరొచ్చెరా
మత్తడి దుంకి అలుగు తన్నుకుని పారినట్లు
మెత్తటి గుండెలు సైతం నగారై మోగినట్లు
నెత్తిన బోనమెత్తి శివసత్తులు దుంకినట్లు
॥ చలో ధూం దాం ॥
నాటి మున్నూట పానాల మునుమే ఇదిరా
అది ఎగిలివారే పొద్దు ఎరుపే గదరా
సుడిగాలై కరీంనగర్ సుట్టూకొస్తే
రంగూ-రంగులా జెండలన్ని ఎలిసిపాయెరా
॥ చలో ధూం దాం ॥
అభివద్ధి కొంగజపం భైరంగంరా
జలవనరుల తెలంగాణ మనదే గదరా
సవాలన్న రారాజుల గోసులూడగా
మన రోషం జనహోరై జైకొట్టెరా
॥ చలో ధూం దాం ॥
కూలిన మన సెరువులకు పానాలొచ్చురా
ఎండిన మన వాగులకు పరుగులొచ్చురా
తల జుట్టేసి మక్కల కంకులూరగా
వలసెల్లిన పచ్చులు తమ గూడు జేరగా
॥ చలో ధూం దాం ॥
మబ్బులు తొలగి సెంద్రుడు నేలను జూసే
నీటి కలువలేమో రంగులతో సింగిడివేసే
పల్లెసద్దుల నాడు సిబ్బిలో పువ్వులు పేర్వా
దసర పండుగ జేసి పాలపిట్టను జూడా
॥ చలో ధూం దాం ॥
భావాలకు జీవోలకు కాళ్లే రాంగా
విశాలాంధ్ర వాదాలకు సావే రాంగా
రెండో ఎస్సార్సీ సన్నాయి నొక్కులపైనా
మన రాష్ట్రం మనదన్న హక్కులనే చాటగా
॥ చలో ధూం దాం ॥
నీళ్లు దోసేటి నీచులతో పందెం గాద్దాం
భూకబ్జాదారుల కెదురు లడాయి జేద్దాం
కోతబెట్టి కరెంటు పంట లెండబెడ్తే
ఇండ్లు గూల్చి పేదోళ్లను తరిమీ కొడితే
॥ చలో ధూం దాం ॥
కాముడు సుట్టూ సేతిలో సెయ్యేసి దుంకుదాం
జాజిరికోలలే జంట తాళాలై ఆడుదాం
ఢిల్లీకి మన డోలు దెబ్బ ఉరుములుగ వినిపిద్దాం
డప్పుగొట్టి తెలంగాణ సాటింపు జేద్దాం
॥ చలో ధూం దాం ॥
ఉడుకు నెత్తుర్లతో ఈ నేల తడ్వొద్దురా
దోపిడీకి, ద్రోహాలకు తావొద్దురా
ఎములాడ రాజన్న పబ్బతి పడదామురా
ఎగిరెగిరి తెలంగాణ ఉట్టే గొడ్తామురా
॥ చలో ధూం దాం ॥
చలో ధూందాం తెలంగాణ దండుగట్టరా
లేసి ఉరుకంగ ముసలోళ్లకు రోషమొచ్చెరా
మన రాష్ట్రం అచ్చెదాక పన్నులు గట్టొద్దురా
పల్లె పల్లె తెలంగాణ పాలన నడవాలిరా

కలం: మిత్ర            గళం: విమలక్క