మేం పనికిమాలినయ్ రాయం,ఓ Like కొట్టుర్రి సాలు

  • కొమ్మ చెక్కితే బొమ్మరా... తెలంగాణా గ్రామ దేవతల పాట

    కొమ్మ చెక్కితె బొమ్మరా కొలిసి మొక్కితే అమ్మరా





    రచన : అందె శ్రీ

    కొమ్మ చెక్కితె బొమ్మరా కొలిసి మొక్కితే అమ్మరా
    ఆదికే ఇది పాదురా కాదంటె ఏదీ లేదురా॥ 2 ॥
    జాతి గుండెలో జీవ నదముల జాలువారే జానపదముల
    గ్రామమును కాపాడ వెలసిరి గ్రామ దేవతలెందరో

    ॥ కొమ్మ చెక్కితె ॥

    గూడుగట్ట గుహలనొదిలీ గుండె రాయి జేసుకున్నారు
    కండలను కరిగించి కన్న కలలను పండించుకున్నారు॥ 2 ॥
    సేదదీరి మనసులోన శక్తి ఏదో ఉన్నదనుకొని
    భక్తీ యుక్తులు ధారపోయగా ముక్తి నొసగ శక్తి బుట్టె

    ॥ కొమ్మ చెక్కితె ॥

    కన్న తల్లిని పరశురాముడు కాని కష్టాలెన్నో బెట్ట
    ఇంటి ఇంటికి బోయి నను  కాపాడమని కన్నీరుబెట్ట ॥ 2 ॥
    ఎల్లరు కాదంటే మాదిగ ఇంటి లందల్లోన దాగి...
    సబ్బండ జాతులు కొలువ పల్లెల  కులముల ఎల్లమ్మ బుట్టె

    ॥ కొమ్మ చెక్కితె ॥

    పల్లె సీమలు పచ్చగుండా ఊరు వాడా సిరులు నిండా
    ఎటికడ్డము నీటి నిలువా  కట్టడాలకు కాపు తానై ॥ 2 ॥
    చెరువు కుంటలే కాదు బతుకు దెరువు కోసం ఏది జేసినా
    మానవుల నమ్మకములో మైసమ్మ పురుడు వోసుకున్నది

    ॥ కొమ్మ చెక్కితె ॥

    భాష మీద దాడి చేస్తిరి బతుకు మీద దాడి జేస్తిరి
    భరత జాతిని తరతరాలుగా బహు విదాల బాధ పెడితిరి ॥ 2 ॥
    ఎవరి నమ్మకాలు వారివి ఎక్కిరించే హక్కు లెక్కడివి
    అగ్గికి చెధలెట్ల  బడుతది నిగ్గదీసి అడుగుతున్న

    కొమ్మ చెక్కితె బొమ్మరా కొలిసి మొక్కితే అమ్మరా
    ఆదికే ఇది పాదురా కాదంటె ఏదీ లేదురా॥ 2 ॥



  • You might also like

    వ్యాఖ్యలు లేవు:

    వ్యాఖ్యను పోస్ట్ చెయ్యండి